تازہ ترین

لندن(پ ر) جماعت اسلامی آزادجموں وکشمیر کے امیر ڈاکٹر خالد محمود خان نے کہا ہے کہ مہنگائی کے طوفان نے غریب آدمی کا جینا دوبھر کردیا لیکن حکمرانوں کی شہ خرچیوں میں کوئی کمی نہیں آئی،مہنگائی کے ہاتھوں مشکلات کا شکار غریب عوام کو ریلیف فراہم نہیں کیا گیا،غریب غربت کی لکیر سے نیچے جارہا ہے اور حکمران قومی خزانے کو اللوں تللوں میں اڑارہے ہیں،حکومت ہوش کے ناخن لے عوام کو ریلیف فراہم کرنے کا اہتمام کرے،مردم شماری احسن اقدام ہے لیکن کشمیرکی خصوصی حیثیت اور مقامی زبانوں کو شامل نہ کرنا قبول نہیں ہے مردم شماری میں آزادکشمیر کی خصوصی حیثیت اور مقامی زبانوں کو شامل کیا جائے،پیپلز رائٹس فورم کے مطالبات اور احتجاج کی جماعت اسلامی مکمل حمایت کا اعلان کرتی ہے ان کے مطالبات مبنی برحق ہیں ان کو پورا کیا جائے،ان خیالات کااظہار انہوں نے اپنے پیغام میں کیا،انہوں نے کہاکہ حکومت آزادکشمیر خطے کے سٹیٹس کو تبدیل کرنے پر آمادہ ہے آزاد خطے کے غیرت مند اور حریت پسند عوام قبول نہیں کریں گے،انہوں نے کہاکہ حکومت آٹے سمیت دیگر اشیاء خوردونوش پر سبسڈی دے تا کہ غریب لوگوں کو ریلیف مل سکے غیر ترقیاتی بجٹ میں کمی کی جائے مراعات یافتہ طبقے سے مراعات واپس لی جائیں جماعت اسلامی نظام عدل کے قیام کے لیے جدوجہد کررہی ہے۔